Il poeta rivendica le terre al mare

A-o l'è staeta, Rattazzi, ûnna sciortïa
d'attaccâne a Lûsciandra
comme se porriae fâ con ûnna mandra
ch'a se manda in sa e in là secondo a gïa.

Ti të lasciòu invescigâ de balle
se no ti no streppavi
a Zena o Leme con Voltaggio e Gavi,
ne Rigoroso e Arquà né Serravalle,

Nêuve, Parodi, Goä co-i so maercheixi
a Borbëa da-e Vigneue scinn-a a Cabella;
ma chi o l'è quella lingua de sciarbella
chi à dito ch'èn mandrogni e no zeneixi?

Oua vegniä a region: scialla Manena!
ma armeno o contentin
che a Ligûria a ritorne in ti confin
de l'antiga Repûbbrica de Zena!

Comûni, paisettin, borghi, çittae,
se ciamman tûtti "ligûre", perdïe!
no ï aviàn miga battezzae pe rïe,
che o titolo o risponde a ûnna realtae.

Ligûri tûtti, e figgi d'ûnna taera,
ricca de gran, frûta, polenta e vin,
che da-a ciann-a a rimonta l'Appennin
per chinâ in mëzo a-e oìve a-o mâ ch'o saera,

Co-ae croxe de San Zorzo in sciä bandëa
cö Grifon pronto a fâ pagâ e offeise
oh taera benexïa, taera zeneise!
te voemmo ûnïa, sempre ciû bûlla e fea.